ТФТ станува општествено-одговорен клуб

Промената на структурата во клубот придонесе ТФТ оваа сезона да го рашири својот ангажман и во други области од општественото живеење.

Одамна е познато дека клубот има високи амбиции, се наоѓа во постојан раст на сите полиња, а заедно со успесите на теренот, доаѓаат и резултатите надвор од него. Тоа, меѓу другото, го обврзува ТФТ да обрне внимание и на останатите сфери и во таа насока е следната акција, која се однесува на екологијата во општината Карпош од каде што потекнува клубот. За утре во трговскиот центар „Лептокарија“, ТФТ организира Ден за чистење, акција во која очекува да се вклучат сите жители на општината.

„TFT CARES | ТФТ СЕ ГРИЖИ. Од нас, за нашето маало!

В сабота целиот тим на TFT има една заедничка цел, затоа:

Ве повикуваме сите заедно да придонесеме и да го направиме нашето маало подобро и почисто место за живеење.

Собирно место: Кофеин бар, 11:45ч

Дојдете, исчистете го маалото, донесете полна кеса со отпадоци и добијте влезница за следниот натпревар на наш терен.

Крајна дестинација: Кофеин бар, 15:00

Препрати на комшиите и дојдете заедно!“, стои во повикот од ТФТ, а освен билет за следниот натпревар на тимот, против Чаир, за сите што ќе учествуваат во акцијата има и бесплатно кафе во кафе барот Кофеин.

Ова е само прва од низата активности кои ги планира ТФТ во следниот период. Понатаму следуваат акции за дарување крв, донирање облека итн.