ТФТ останува непоразен со петта победа во низа

Екипата на ТФТ ја продолжи победничката серија во новата сезона и веќе стигна до петтиот триумф во исто толку одиграни натпревари.

Нова жртва на тимот од Тафталиџе е Шкупи кого лидерот на табелата го победи со 82-73, но конечниот резултат не е реален одраз на она што се случуваше на теренот. Гостите беа рамноправен ривал до 18. минута, а се понатаму одеше на контото на ТФТ кој во еден момент водеше и со 24 поени разлика.

Шкупи подобро го почна натпреварот и во шестата минута водеше со 13-7 што беше негова највисока предност. Слично беше и во вториот период, чаирчани последен пат водеа на стартот од 18. минута (28-27), а потоа почна доминацијата на ТФТ. До крајот на полувреме нашиот тим направи 40-34, а се беше решено по серијата од 14-0 во третиот квартал по која ТФТ отиде на огромни 59-40. Највисоката предност ТФТ ја достигна во средината на последната четвртина (80-56) по што дојде до мало опуштање во нашите редови со што Шкупи го искористи тоа за да го ублажи поразот.

Сапунџиев со 13 поени беше најефикасен во редовите на ТФТ, Зафиров додаде 11 со 8 скока и 4 асистенции, а Николов 10 поени.