Тим
ИСТОРИСКО ФИНАЛЕ ЗА ТФТ – НОВА ПОБЕДА ПРОТИВ РАБОТНИЧКИ
Екипата на ТФТ ќе го предизвика МЗТ Скопје во годинешното финале од македонскиот кошаркарски плејоф.
Во третиот меч од серијата против Работнички, тимот од Тафталиџе славеше со 92-73 и со вкупни 3-0 обезбеди пласман во големото финале, првпат во клупската историја. По триумфот во Купот на Македонија во 2022 година, ова е најголем успех за овој клуб кога станува збор за домашното кошаркарско првенство.
До него дојде на доминантен начин и со одлична игра во втората и третата четвртина кои ги доби со вкупен резултат 46-23. Поради тоа, се на овој натпревар беше решено уште на средината од третиот квартал, а во последните десет минути немаше апсолутно никаква неизвесност. ТФТ во еден период имаше и 25 поени предност и му остана само мирно да го приведе мечот кон крај.
Говенс со 18 поени беше најефикасен кај ТФТ, Стојаноски постигна 17, Зек Браун оствари дабл дабл со 15 поени и 11 скока, а Хотон реализираше 14 поени.
ТФТ во финалето ќе се обиде да ја прекине доминацијата на МЗТ Скопје и да го оствари својот најголем успех во своето постоење.